PEPETING TRESNA

Wulan mlaku sansaya nduwur

Nganti tekan langit sap pitu

Lintang kang cumlorot ing tawang

Kumleyengan ing saknduwure tawang

Sumribite angin anggawe wengi sansaya nyenyet

Kangmas…

Delenga rembulan kang nangis ing kamar iki

Delenga srengenge kang umpetan ing kamar iki

Hanamung  wengi kang nyekseni

Rembulan lan srengenge kang saya mbleret

Kangmas…

Aku amung bisa nyelehake pangarep-arep

Marang katresnan kang gumantung

Aku amung bisa nyawang

Pasuryanmu saka banyu kang tumetes

Kangmas…

Aku amung nduwening pepenginan

Pepenginan yen tresnaku iki

Tresna kang sinambung

Kayata Rama lan Shinta

Ananging

Kabeh iku amung impen

Impen kang anggawe tatuning ati, batin lan uga raga

Aku lan sliramu ora bakal jejodoh

Amarga sliramu ora tau wungu

Yen tresnaku iku tresna kang asih

Katresnanan iki geguritan kang sejati

Kang tansah urip ing ati iki

Sanajan sliramu ora nggubris

Marang tresna kang asih iki

Tresnaku bakal ora binagi ing liya

MUSPRA

ngawangku ngambra-ambra

impiku selot suwe selot ndradah

kepengin aku nyanding awakmu

entong selot suwe wektuku

ning ora nana kasile

lamunanku mung siji

aku bisa ngomong apa sing tek  rasakna

rasa sing wis tukul suwe,

apa sing tek arep-arep mung muspra

selot suwe selot keton

aku dianggep nek kowe butuh

tininggal nek wis ra butuh

iya kiye pancen bodoku sing ora bisa nglomboni tresnaku

SUMOROTING RASA

Padanging cahya kang sarwa kumenyar

Pating sumorot madangi petenging ati

Nylorot kaya dene blencong

kang madangi layar

Kang bisa nggawe ayang-ayanging wayang

Ora beda awakmu

kang wus ngayang-ayang ing atiku

Pating sliwar, pating sliwer lumaku ing awangku

Batinku ngambra-ambra rasa apa iki

Rasa kang beda saka rasa liya-liyane

Beda saka rasa kang tak rasa wingi kae

Apa kowe ngerti rasa apa iki ???

Tak kira kowe ora bakal ngerti

Merga aku amung dadi pipit ing sisihmu

Kang gawe laraning obah lan polahmu...