Bima Krodha
Critane
diwiwiti jejer Astina. Prabu Duryudana diadhep para punggawa lan santana.
Pasewakan iku katon regeng, awit saliyane kabeh para punggawa lan kadang kraton
kang ngabyantara uga ana tamu kang lagi wae rawuh saka Jodipati aran Werkedura. Praptane Raden Werkudara ing
Astina iku ndadekake kagete para Kurawa jalaran wektu iku Raden Werkudara lagi
wae diutus njegur segara seperlu ngupadi banyu suci perwitasari.
Sawise
bege-binage nuli sang Begawan Durna pitakon marang Werkedura antuk gawe lan
orane. Barengt raden Werkedura ngendikake yen oleh gawe, Prabu Duryudana kaget.
Patih Sengkuni tanggap, nuli gawe rekadaya amrih Raden Werkedura bisa rukun lan
kumpul karo Kurawa. Werkedura dipaeka kanthi pambujuk supaya njaluk kamukten
ing negara Amarta jalaran Raden Werkedura iku paling gedhe labuh labete marang
negara. Werkedura sarujuk, nuli budhal menyang Amarta nedya njaluk kamukten.
Budhale Werkedura ditutake wadya bala Kurawa.
Tekan
tengah alas kepapag Raden Senggana Anoman kang ing kono uga ana Werkedura.
Perang antarane Prajurit Kurawa lan prajurite Anoman rame banget. Prajurit
Kurawa kasoran ing yuda nulya mlayu saparan-paran. Ewa samono pangamuke
Werkedura saka Astina ora mendha sateman Anoman sakanca padha kalah. Pungkasan
perang tandhing antarane Werkedura saka Astina klawan Werkedura saka Kendali
sada.
Sigeg
kang kawuwusan gantya kang cerita. Raden Werkedura kang nggebyur ing samodra
ora tumeka pati, ing dhasaring samudra malah antuk dalan padhang kang jembar
gilar-gilar. Raden Werkedura kapanggih Dewa Ruci. Raden Werkedura diwejang
sakehing ngelmu kasempurnaan kanthi mlebu kupinge. Wejangan purna, Raden
Werkedura banjur diutus enggal bali menyang Amarta.
Tekan
gisiking samodra, Raden Werkedura wis dipapag Raden Senggana Anoman. Raden
Gatotkaca, Raden Setyaki, lan Antasena. Ing kono Raden Senggana nelakake yen
ana Werkedura loro lagi padha bandayuda. Raden Werkedura duka yayah sinipi.
Werkedura kekaroane den sirnake kanthi pitulungane Prabu Kresna lan Semar
Badrayana. Werkedura saka Astina bandhar dadi Bathara Kala, dene Werkedura saka
Kendalisada bandhar dadi Bathara Bayu.
Sawise
purna ngenya bandayuda, Werkedura nulya bali menyang Amarta. Ing kana
panjenengane dipapag lan disubya-subya dening punggawa, nayaka lan kawula.
Tidak ada komentar:
Posting Komentar